عنا البوقرنين جيبو أمريكا

في يوم 10 أوت إنشالله سوف تعطى صافرة بداية البطولة الوطنية المحترفة للموسم الجديد بما فيه من لكم وضرب مبرح وطرد ومقابلات بدون حضور جمهور وأعمال عنف شديد وإنعدام للروح الرياضية... وزادة باش ما نظلموش الناس، شوية كرة قدم.
الهمهاما كيما كل موسم تحسها داهمة على جبل بقدومة نظراً لموارد المدينة الضعيفة وإلي نذكركم تتقتصر على تحركات سكانية ليلية نحو بالرمو أو جينوفا أو غيرهم على متن سفن غير مريحة بالمرة وشوية بطاطا وشوية قناريا إلى جانب، والحق يقال مزروعات كبيرة من النعناع موجودة رغم كل الغرابة على حافة ميدان الملعب البلدي بحمام الأنف.
حسب آخر الأخبار المنجي بحر باقي على رأس النادي. وما نكذبش عليكم حبيتو يمشي خاطرني لتوة ما هظمتش إنتقال العربي الماجري حارسنا الكبير إلي علقنا عليه آمال كبيرة وإلي تباع بإخ تف للترجي ومن دون ما يعلم حتى حد.
المدرب العائد رضا عكاشة لاهي بالأمور الفنية ونتمناولو باش بعد الجولة السادسة يكون مازال حاضر.
بعد ما مشى الحارس العملاق محمد الزوابي إلى حمام سوسة جبنا من النادي الإفريقي الحارس القصير والموش دوني أنيس الزيتوني.
سينون انتدابات بودورو قادمين من فرق بودورو من أعماق الدنيا.
المهم مشينا حجزنا بطاقة علاج في إنتظار الكارطة متاع الجمعية وبقدرة ربي رغم الفلوس إلي ما عناش والفاتورات إلي موش خالصة والإنتدابات التي لا تستحق الذكر ستظل الهمهاما صامدة شامخة كشموخ الجبل المطل على بحرها.
وانشالله السنة نطلعوا برشة ملاعبية من فروخنا باش كي العادة نعقدو برشة جمعيات وما نطيحوش وعلاش لا نهزو حتى كويس صغير كان موش متاع تونس متاع تاي والا كابوسان موش مشكلة.