Les fidèles du Boukornine

mardi 26 août 2008

صاحبي مخي



أقدم صاحب وأخلص صاحب...
نبوحلو بأسراري وعمرو ما يخون...
نحكيلو على أشجاني وما سبقلوش قاطعني...
يسمعني حتى نكمل ومن بعد يناقشني...
ما يبخلش عليا بالنصيحة ويحاول يصلحني...
صارت قبل تعارك هو وقلبي، ولات مشاكل وبونتووات...
رصاتلي نقلهم كلكم أعضاء ومستحيل واحد يختار بين بوه وأمو...
أما معذور... معلوم إلي همو الوحيد مصلحتي...
يونسني في وحدتي وكي نتحتاجلو ما يترددش لحظة...
هو الغالي العزيز، صاحبي وعشيري...
إلي ما يفارقني كان وقت النوم...
القبطان إلي يرفع الشراع ويحدد الوجهة...
يا مخي عاشت الصحبة ودامت العشرة...
خاطر انتي أحلى غصن من أغصان الشجرة...

9 commentaires:

Anonyme a dit…

ســــلام يــا صــــاحـبـــي

ولد بيرسا a dit…

:-))))))
هايلة الفازة
و الله تحفونة الفازة كي يبدى الواحد في صحفة العسل هو و مخّو، هكاّ كيفك انت
خاطر أنا هاك السّاقط مخّي، سعّات يجيبلي أفكار، تقول عامل عليّ بالعاني، تقولش متشمّت فيّ
:-)))
مرّة تفاهمو عليّ هو و حارتين بيرّا و قالولي برّا توّا أطلع أسهر في الحمّامات.... شويّة لا كليت راسي في الأوتوروت

مرّة قالّي برّا لهاك البلُندة و قلّها نحبّ نخرج معاك، ياخي كليت نبزة موش نرمال

و موش لازم نكمّلّك عادا العمايل الّي عملهم فيّا......ها المخّ المعوّج الّي عندي

كان نلقى نبيعو و نشري واحد آخر جديد، و الله لا نوخّرها لتالي
آما آش باش يجيبلي زعما؟؟؟؟؟ حتّى شيء!!!!!ـ
حاسيلو صحّة ليك يا خليل، ربّي يفضّلّك مخّك
:-)))))

WALLADA a dit…

ربِّـي يدَوِّم العشرة

أما حتـَّى القلب ما عندك فيه ما تقول رغم مشاكله و الوضعيّات الِّي يحطّك فيها يقعد هو الِّي يعطي لحياتنا لون و طعم و ريحة

Alé Abdalla a dit…

يا ولّادة عندك الحق لكن حتّى من القلب يتحكّم فيه المخّ باش يظخّ الدّم و بسّ لكن بيت الإحساس و الأوجاع و الأفراح و المسرّات هوّ الإيبوطالاموس.

Sofiene Chourabi a dit…

ربي يخليكم لبعضكم

Amira Yaakoubi a dit…

@khalil:
a3azz sa7eb houa el mo55;
berrasmi;
3andek el 7a9!
rabbi ifadhelkom leb3adhkom:)
@weld byrsa:
allah ghaleb se3a se3a el mokh yebda yet3awej...
ema géneralement ça ne dure pas longtemps;
rod belek 3la rou7ek sidi khouya;

Khalil a dit…

---> Boukhari
يا خويا وينك ؟
توحشنا بخار أنفاسك ! وتوحشناك !

---> Byrsa
:)))))))))))))
قتلتني بالدوحك يا بيرسا!!!
كيفاش ما فماش شكون يشري ؟
نتفاهمو على بلاصة جيبلي مخك وتو تشوف السوم إلي نجيبهولك !
نعرف برشة ناس يحلموا بمخ كيما إلي عندك ! :)))
هاو في بالك !! :)))

--->Wallada & Ala

أهلا بيكم!
المشكلة إلي ديمة تتعاود بين أهل الفكر وأهل العلم... زعمة فين موجودة الأحاسيس...
تاريخياً وفي الأشعار نقولوا القلب هو مصدر كل المشاعر... و علمياً الأحاسيس كيما قال علاء موجودة في الإيبوطالاموس...
أيا مالا تفاهموا بيناتكم وأعطيوني آخر قرار باش نعرف شكون صاحبي مخي وإلا قلبي :)

---> Sofiène

يا خويا ربي يفضلك!
و انشاالله ما تنقطعش عن التدوين وديما تقعد تتحفنا بالجديد خاطر أكيد تعرف إلي رغم الحجب كلنا مازلنا نطلعوا على فردة ولقات أختها ورانا كلنا متضامنين معاكم!

---> Pink

Rabbi ykhallik ya a3azz pink !

ولد بيرسا a dit…

خليل

اسمع، تو نسإل الدّكتورة "بينك" كان فمّا إمكانيّة الواحد يعيش بلاش مخّ جملة و الله العظيم لا يزيد عندي ليلة:-)))).....ـ
تو نمدّهولك و اتصرّف معاه.... تحبّ تبيعو، تحبّ تتبرّع بيه لل 26ـ26، تحبّ تصلّحو و ترجّعهولي، ... أعمل الّي يضهرلك
برجوليّة ماذابيّا نرتاح منّو و من أفكارو الحولة

أيّا مشات معاكم؟؟؟؟؟

Khalil a dit…

هايل ياسر يا بيرسا!
تو نمشي مالا للأصدقاء في سوق العصر وزرقون وبومنديل...
وكمل توا رمضان على الأبواب... وماك تعرف الناس الكل مخاخها تتفرقع بالجوع ...
تو ندبر سوم باهي ياسر...