نجوم آخر زمن

أمر معروف أنو الإعلام قادر أن يصنع نجم ساطع من إنسان فاشل على كل الأصعدة . أحسن أمثلة الشلايك إلي قاعدين نراو فيهم (من غير ما نقعدو نسميو خاطرنا موش في محكمة) وإلي بمجرد ظهور في مسلسل رمضاني أو في منوعة يولي ضاربتو الدعوة ويمشي بأكتافو بين الناس وكأنو فتح إفريقيا وإلا ماخو جائزة نوبل ويحكي بكل وقاحة بإسم الشعب ويخاطب في الشعب ويعرف إلي يصلح بيه.
والمشكل الكبير أنهم برشة من أفراد شعبنا الأبرار يدخلو من غير ما يشعروا في هذه الدوامة ويساهمو ولو بصفة تلقائية في زيادة تضخيم التفشة إلي تسخايب روحها ولات جبل.
الموضوع هذا حكيت عليه لأنني لم أعد قادر على تحمل رؤية عباد بدون حتى قيمة بشهادة الجميع واقفة تهيب على الناس بينما آخرون وصلو إلى اكتشافات معترف بها دولياً والتواضع متغلغل فيها...
وإلا يظهرلي في البلاد هذه عاطين قيمة أكبر ببرشة من اللازم للشلايك والدليل على ذلك الثمن الباهض إلي وصلولو في الأعوام الأخيرة. والحمدلله مهما غلات الشلايك في المغازات الفاخرة تقعد الشلاكة شلاكة والصباط صباط وهذه قاعدة مستحيل يغيرها الزمان.