أقوى خنار... خنار الدينار

كانت حاجة اسمها دينار...
يا حسرة على الدينار...
تي شكونو هذا إلي كان يوصل يهز عينيه مع الدينار؟ نثبت عليه كان يمشي يتقزدر في الحومة وحتى راجل ما كان يوصل يهز عينيه في حضورو... لا درهم مغربي،لا يورو،لا فرنك فرنسي... كانت حاجة اسمها دينار...كان باندي الدينار من طينة الباندية الصحاح... كان الدينار يعديلك سهرية توقف المخ وتسوى ألف من السهرياة إلي على ألفضائية... هوما قلوب كحل، هو قازوز، هو بسكويت مستورد من بلاد الغال...تي كان فال شكون في حياتو يكسب حاجة من هل قطعة إلي يحكيو عليها ويسميوها دنوس...
كان العربي كي يبدى قادم على سفر، يمشي يصرف فلوس وهو عامل كيف... كان المليون مليون بالرسمي، تحلك مشروع صحيح من نوع حانوت ملاوي، والا حانوت حجام من غير حتى قلق... أما توا ؟ اللطف من توا...
توا قاعات الشاي كالبطاطا... وباش تبدى مواكب لعصرك لازمك تبدى من الرواد متاع هلبلايص هاذم... واللذي ما في حالوش يتسلف، مش مشكلة... وتوا الدينار ولا مجرد بقشيش حقير،وهذا كان سلكها...أما إذا كان تصل بنا الوقاحة باش نقارنو بين عملتنا وعملة الناس الأخرى(ربي يحفضنا من الناس الأخرى) تزيد شوية وتحلف عليها بمين ما عادش تصرف دينارات حتى إلى الممات باش ما عادش تشوف السحر من نوع 600 يورو =مليون تونسي وهذا في أحسن الحالات... هي في الحقيقة، هذا التطييح في قيمة العملة المحلية داخل في نطاق مجموعة من الإجراءات إلي ياخذوهم بلدان نامية باش يشجعوا المستثمرين الأجانب باش يجيو يشرفونا وزادة باش المنتوج المحلي كيف نجيو نصدروه، نبداو إنجمو نتنافسو مع بلدان نامية كيفنا وتبدى سلعتنا تضهر أرخص...
ادن النية طيبة أما يا خوية الدنيا غلات وكيما قال
géant ما يغلى عليك شيء...
انستو