Les fidèles du Boukornine

mardi 4 novembre 2008

ثلاثون أو شطر محبتي للسينما



في العادة ما نحبش ننقد السينما التونسية البائسة...

هوما كان سلكناها فما أربعة أفلام في العام ونكمل أنا نجي نسبلهم عرشهم الأول ما جات شيء...

أما ما نخبيش عليكم، بعد
الفيلم إلي تفرجت فيه البارح قررت نخرج من التحفظ الزايد متاعي ونعطي كل
ذي حق حقه وكل من يستحق السبة نعطيه برجو طالعو...


قبل كل شيء، دين أمهم ثلاثين
سنة وهوما يبكيونا في التلفزة في هاو السينما التونسية تحتضر وهاو الجمهور
يهجر صالات السينما ومن بعد كي نقرر باش نمشي نتفرج نطلب منهم التعريفة
الخاصة بالطلبة خاطرني خوكم زوالي وقبل ما نمشي نتفرج في شريط نحسبها في
المخطط الجديد قبل بستة أشهر على الأقل... تجي عاد السيدة إلي تقص في
التساكر تطلب مني ما يثبت. عطيتها "كارط ديتوديان" أو شهادة طالب بلغتنا
فقتلي سامحني سيدي راهو هال كارطة متاع عمناول ما عادش تصلح... لا حول ولا
قوة إلا بالله...


توا دين والديها كيفاش تحبني
نطلعلها بكارطة متاع السنة وهوما مازالو ما عطاوهناش ؟! نجيبلك شهادة فقر
؟ مضمون ولادة ؟ رخصة سياقة ؟ شهادة وفاة باش تصدقني؟


تي علاش البهامة؟ وإلا ديما
نتعقربو على بعضنا؟ ماكم نحيوها جملة حكاية طاريف إيتوديان ويزيو من الكذب
والتبلعيط والله لا تباركلكم في هاكل دينار و نصف الزايدين ...


يا سيدي منذ بضع اسابيع دقني ربي ومشيت تفرجت في الفيلم الكارثة شطر محبة لكلثوم برناز.

ساعة في صالة كاملة كنت أنا
المخلوق الرابع والأخير إلي دخل يتفرج. من الأول استغربت وقلت حرام عليهم
ولاد شعبي متلفين الثقافة في عوض يشجعوا المبدعين...


بعد بساعة بالضبط ولأول مرة في تاريخي هزيت دبشي وهممت بالخروج لاعناً النهار إلي تغرمت فيه بالسينما...

مانيش مختص في الميدان ومانيش
باش نفرعن على روحي ونقلكم المشكلة في زوايا التصوير ولكن برجولية ياسر
حكاية حولة إلي طلعتنا بيها الأخت كلثوم... كاستينغ يبكي الحجر... صحيح ما
عندكش برشة فلوس باش تجيب ممثلين كبار لكن يا كلثوم يهديك كي تجيك فكرة
المرة الجاية أقعد في دويرتك تبع الإعادة متاع صيد الريم في قناة 21
وفلوسك في جيبك أرتحلك وكانك ماكش مقتنعة بربي خمم في أفراد شعبك إلي
شطرهم شلطوا رواحهم في جرة الفيلم متاعك...


والفازة فاش الفكرة في الأصل
قوية برشة وكان عطاتني كاميرا بورتابل وقاتلي أعمل إستجواب للناس في
الشارع حول رايهم في الحكاية راهو جات حكاية أحلى بألف مرة...


حاسيلو، خليني نسكت خير لا يتقطعلي عرق ويزيدوني في القائمة الموسعة متاع ضحايا كارثة كاترينا، يا ربي نقصد فيلم شطر محبة...



إي يا سيدي ماني مشيت البارح عاد نتفرج في فيلم ثلاثون...

كيف العادة ما فيبالهمش إلي فما تعريفة خاصة بالطلبة وما في بالهمش إلي فما طلبة جملة...

مش مشكلة مانا فهمنا الداقزة...

ماهم طامعين فينا...

كولوا بالشفاء!

إييييه عاد فين كنا وفين صبحنا؟

هذا فيلم والآخر فيلم!

هاذوما ممثلين والأخرين ممثلين...

باش ما نطولش عليكم أقوى فيلم تونسي تفرجت فيه إطلاقاً ومن أقوى الأفلام...

هو سيناريو، هو تصوير وهو
إضاءة (هاو بديت نفلم عليكم فقتو بيا نكذب ولا نظهر ناقد سينمائي كبير ؟ )
وهو حوار وهو كاستينغ وهو .. وهو ...


آش باش نقلكم ؟

علي الدوعاجي ، الشابي ، الحداد (وهو الراوي) الكعاك ، السنوسي، الحامي ، بورقيبة وغيرهم وغيرهم ...

نحنا في الحقيقة في تونس
ناقصين برشة في النوع هذا متاع الأفلام أي الأفلام التاريخية وتاريخ
بلادنا ثري يعملك مليون فيلم وديما عندك ما تحكي...


وأكيد برشة ناس باش يتعلموا من
خلال الفيلم لحظات هامة من تلك الفترة وإلي خلات تونس تكون ليوم بلاد حرة
مستقلة، رجال صنعوا تونس بتضحياتهم انشالله نكونوا في مستوى أعمالهم
الجليلة...


وللناس إلي حافظين درسهم إحساس
جميل أنك ترى أخيراً وجه يجسد هؤلاء الأبطال ويخليك تقارن بين ما صوره
خيالك وما اختاره لك فاضل الجزيري...


المهم ضروري تمشيو كلكم
تتفرجوا كانكم في تونس وإلي من مواطنينا بالخارج، ما فيها باس يرجعوا
للبلاد على نهيرين ثلاثة وتو نكلموا مولى القاعة يعمللكم "تاريف ديتوديان"

4 commentaires:

Ignescence a dit…

J'ai assisté à la première projection de ce Film à la salle de CinemAfricArt certe le prix du billet est un peu exhaustifs pour les petites bourses (4 Dt) mais le film en vaut le coup. Ce qui m'a le plus touché c'est que pour une fois qu'on fait un film qui parle de la tunisie d'une certaine époque, n n'a pas fait que parler des bains maures de l'époque et des scènes de baise dans les palais des bourjois (Silence des palais, ...etc.) par contre je dois admettre qu'il y a du progrès à faire sur l'écriture cinématoghraphique et sur la BO du film qui passe sous un silence non homogène pour tout le bruit qui a été fait autour ;) bref l'autre remarque c'est plus pour le ministère de l'éducation et de la formation, j'aimerais qu'on nous explique si étudier le pourquoi du départ de Almouezz li din elleh vers le caire pour faire une partouse et se repentir en construisant une mosquée, et que bouloukin ibn ziri a racheté la tunisie en fond de commerce après est plus important que cette phase de notre histoire que nous dévoile le film "trente"? Sincèrement j'ai connu des membres de la Famille e Tahar Sfar et je n'ai jamais su qu'il était amis avec Chebbi, Haddad et Douaji! par contre si on me pose la question sur l'année dans laquelle Adam Smith a voulu snober Taylor et sortir une version plus onéreuse du capitalisme je saurais répondre tout de suite! Bref je tiens à encourager cette initiative et j'espère que ça poussera le réalisateur à en faire d'autres dans ce style et pourquoi pas créer une base de données cinématographique pour l'histoire Tunisienne moderne ;) et avec des tarifs étudiants bien entendu :p et pourquoi pas des projections gratuites pour des groupes d'étudiants ;)

HNANI a dit…

يا ناري على وليدي، اتصوّرت قدّام إلي اتقص في التساكر وانت تتغصور و وجهك أحمر
يا ولدي قبل كانو يعملوا تاريف طالب ، وقت ماكانوا يحترموا الطلبة، توا لا فيه احترام ولا شيء
المرّة الجاية ما تمشي كان كيف يزيدوكم في البورس ههههه

Khalil a dit…

@Ignescence
Tu as entièrement raison à propos des programmes d'histoire dans notre enseignement national... On nous bourre le crâne avec des informations qui ne te serviront jamais plus...
Alors que des faits marquants de notre histoire sont cités en passant comme si on avait honte de contempler les pages précédentes...
Rabbi yahdi..
Une projection gratuite pour les étudiants ? mahom yeflsou :)
@Hnani
:))
Je rigolais à propos du tarif étudiant ! je tiens à préciser! D'ailleurs l'entrée est très abordable (4dt). Mais ce que je voulais dénoncer c'est leur obstination à user d'un langage pompeux quand les médias leurs posent la question fatidique:" Pourquoi le tunisien ne va plus au cinéma?" Ils répondent en disant qu'ils font tout pour encourager les gens à venir en citant pour exemple le tarif étudiant, alors que son application est désastreuse...
ça aura en tout cas été l'occasion de leurs montrer qu'on n'est pas dupe... :)
au plaisir ya jme3a !

Daisy a dit…

Ce qui m'a plu dans le film c'est surtout l'esprit de révolte et de liberté que tant de Tunisiens semblent avoir oublié.."thalathoun" parle des penseurs,des révolutionnaires qui ont forgé la Tunisie d'aujourd'hui.Malgré quelques lacunes dans le jeu de certains acteurs(moi non plus je ne me targue pas de posséder de grandes connaissances cinématographiques mais c'est ce qui m'a semblé),c'est un film très instructif pour ceux qui s'intéressent à l'histoire de notre pays.