جن الحرية

مسكون يا ناس بجن الحرية
جيبو العزامة خلي يقراو عليا
قلبي كي يتأثر يعمل دقة زايدة
ولساني كي يحكي يقول كلمة رائدة

مرات قدامي ريت العوج المر
قلت خليني ساكت حتى يسلك العمر
تكلم الجن وقالي قوم طالب
يزيك من الخمول ومن كلمة الله غالب

هزيت قلم وأنا متردد
خايف لا الحبار يطلع مصدد
قمت وسيبت أقوى عيطة
ما همنيش إسمي يتفسخ من الخريطة


حاولت يا ناس نسكر فمي
نخبي بين ضلوعي محنتي وهمي
أما يهديه الجن رجعلي
وقالي يا بوقرنين من فضلك إبدعلي
قصيدة وإلا زوز
مليانة إستعارة وكلها رموز

في عيد الحرية بطريقتي نحتفل
شايخ زاطل بريحة مشموم الفل
يا عمار يا غالي تقبل سلامي
كي لميتنا ليوم تحقق جزء من أحلامي