توضيح وتبيين الغالط من الصحيح في الهجرة

بعد ردة فعل خويا وعشيري، المعلم جملة على أخر تدوينة...
حبيت نوضح ونأكد إلي فما زادة مجموعة أخرى من الناس إلي يحبوا بلادهم بصفة جنونية ولكن الوقت هو إلي دفع بهؤلاء إلى الإلتحاق بضفة المتوسط الأخرى مكرهاً أخاك لا بطل... نذكر على سبيل المثال خويا وعشيري، إلي و الحق يقال من أكثر الناس إلي نعرفهم غيرة على ألوان الوطن بدرجة أنو حتى الفريق الذي يميل إليه هو النادي الإفريقي :)
ولكن دراستو دفعتو باش يترك أرض الأجداد قاصد ربي طلباً للعلم...
المهم الناس هاذوما غيرتهم على بلادهم كبيرة وعليهم نعلقو امال كبيرة، باش يرجعونا نهار ويجيبوا معاهم المعرفة والتكنولوجية إلي علمهالهم الغرب...
و هذا في حد ذاتو عمرو ما كان مزية نظراً أن تونس كونتهم وقراتهم -تبارك الله- قداش من عا م بلاش ...
فيا خويا العزيز ان شاء الله تكملنا فيسع فيسع وترجعنا محصن مضمن كيما تقول أمي.. و ماك تعرف، كل ما تحس بالغربة قول لروحك إلي برشة ناس تعدات بالتجربة هذه كيما العبد لله وما يدوم حال...
والسلام على الناس الكل وخاصةً سيد الخلق وخاتم النبيين محمد صلى الله عليه وسلم ديما !