في بلد العجايب، تونس ألخضراء، جميع اصناف المجتمع إتفقوا على اجابيات الهجرة الخارجية نحو البلدان إلي أغنى منا... إلي عندهم أقل شهرية تجي قد شهرية وزير عندنا نحنا...
عاد وين ما تمشي، تلقى أسباب تختلف:
- في الأحياء الشعبية، يقلك من صغري وانا نحلم باش نفارق كاس"الكابوسين" المحتوم وندورها تاي بالبندق متاع الأكابر، نحلم باش نخدم مهما كانت الخدمة، المهم ما عادش نحس روحي عالة على المجتمع ومجرد رقم في دفتر يساهم قدر إستطاعتو باش يزيد في نسبة البطالة...
-في حي النصر مثلاً، يقلك قلقت من الرفاهة. نحب نعرف شنوة معنتها تمرميد و- نحب نعيش كيما الكليبات الأمريكية، هيب هوب وجوي باهي... قلقت من سوسن ومنى، نحب نعاشر سوزان وكاترين...
-إلي موش قاري، يقلك يا خويا، بلادي فيها مئات الاف الطلبة.. بلاصتي موش هوني، مكتوبلي العذاب باش انجم ناكل خبزة كي العباد ونفرح الغالية...
-إلي قرى، يقلك توا أنا قريت قداش من عام بعد الباك وبعت النوم الغالي باش نقعد نكلت ونسلت طول عمري على شهرية توفالي في نصف الشهر ؟ معقول توا؟ إنسان مستواه عضيم وشانو كبير، معترف به دولياً يجي يقصف شبابو ويكمل حياتي في بلد زعمة زعمة نامي؟ ربي يهدي ! :)
إذن جميع الفئات معنية بالهجرة عند بلاد القورة... إلا أنا !
أنا حتى كان نقرا طول حياتي، عمري ما نكبر على بلد النجمة والهلال.
أنا بلاصتي في بلاد الشيشة و الهريسة، في عاصمة الضحك والنكت على الطائر...
أنا ما نجمش نعيش بعيد على أقوى جبل عرفتو الدنيا: جبل بوقرنين...
الخبزة بقدرة ربي نصوروها.
كيفاش تحبوا بنادم يسلم هكاكة هناني بناني في الكار الصفراء ؟ في المترو الخفيف كي يبدى معبي؟ في رمضان والناس تستنى بالصف في الخبز السخون؟ في صوت الآذان يدوي في السماء؟
بلاد المليون كسكروتاجي هي أكثر بلاد تنجم توفرلي راحة البال وسلامة العقل واللسان...
الحمدلله أمي جابتني تونسي حر وانشالله نعيش تونسي حر ونموت تونسي حر.
وكما قال أقوى شاعر:" سأعيش رغم الداء والاعداء كالنسر فوق القمة الشماء"
1 commentaire:
eh. cognitively style ))
Enregistrer un commentaire