Les fidèles du Boukornine

vendredi 30 janvier 2009

التدخين مضر بوزارة الصحة... أما نوووووورمال


التدخين في الأماكن العمومية ممنوع والقانون يعاقب عليه حسب القانون الصادر في 16 نوفمبر 1998 !
الأمر الواقع مختلف جداً حيث في أي بلاصة تمشيلها تلقى ناس تتكيف. أنا واحد من الناس عمرو ما جاء سيجارو في فمي خاطرني كيف كنت عمري 10 سنين وعدت بابا وعد شرف باش عمري ما نتكيف نظراً إلي عندي عزيزي الله يرحمو توفى من سرطان متاع الرواري...
لكن من إلي في المعهد، أنا متأكد إلي بالتدخين السلبي متاعي إلي نتكيفو أكثر من برشة عباد خاطر ما فماش قهوة وإلا بواتا ندخللها وفي أي مكان عمومي وإلا لا الناس الكل تتكيف وما على بالها بحد...
خطر كبير ها التدخين إلي ولى في بلادنا يبدى بصفة عامة من عمر أثناش سنة. وين ماشين ياخي ؟
علاش ما يعملوش حملات يوريو فيها الحقيقة ؟ ناس في عز شبابها تموت وتخلف عائلات كاملين بين يتامى وأرملة؟
ياخي مكتوب علينا نسكتوا عليه الموضوع ؟ وإلا على خاطرو بيزنيس فيه برشة فلوس؟ علاش ما نعملوش الباكو بعشرة آلاف فرنك كيما عملوا في فرنسا باش نحاولوا انقصوا قدر الإمكان من الظاهرة إلي كي وذني هذه ؟ علاش كي يجي فرخ صغير يحب يشري باكو دخان يعطيوه بدون حتى قلق ؟ من الآخر علاش ما نطبقوش القانون كيما يلزم ؟
الحقيقة فديت كي ريت إلي في السبيطار يا بوقلب إلي نورمالمون أكثر بلاصة يحترموا فيها القانون ضد التدخين، الناس الكل لا تبالي!
لا مرضى لا أعوان صحة، ناقص كان يوليو يهبطوا شيشة جيراك ورامي !
حاسيلو أنا ما يهمنيش في المليارات ربح متاع بيعان الدخان أما تهمني صحة بدني وصحة ملايين الغافلين إلي كان يوريوهم المنظر متاع واحد عمرو ما يفوتش الثلاثين وهو ساق في القبر إلاما تتغير كلياً نظرتهم للتدخين.

4 commentaires:

bent 3ayla a dit…

الدخان دويخة اخرى من الدويخات للشعب. التوانسة كان يغليو عليهم الدخان، توا يصير اتعس من احداث الخبز...

Venom a dit…

هذوكم لعبآد إلي يستغلو في الشبه حرية متا عهم على حساب غيرهم !
يلزم وعي موش توعية

أمّا عشرة لاف باكو دخان علاش يا وخي

Khalil a dit…

@ ben 3ayla:
Ahlan ! :)
Peut-être bien, mais il faut quand-même essayer car c'est le prix à payer pour combattre ce fléau qui ronge nos jeunes.

@ Venom:
Visbilement tetkayef ? :)
Béhi on le laissera à 5 dinars le paquet rien que pour te faire plaisir :)

Anonyme a dit…

Une equipe de recherche du CNRS vient de prouver que la nicotine seule n'est pas le declencheur de la dépendance chez le fumeur, expliquant ainsi pourquoi les substituts nicotiques sont inefficaces à long terme - La Presse - (panorama - 02 fevrier 2009)