Les fidèles du Boukornine

vendredi 23 janvier 2009

حسن الجوار صحيح، أما للصبر حدود...


أنا من الناس إلي يعبر عليهم بالمثل الشعبي "ولد باب السويقة والعوج ما نطيقه" (ولو أنا ولد الهمهاما، أما داخلة الحكاية في نطاق العولمة)
في حياتي مريت بعدة مراحل انتقالية كان فيها تبديل الحيوط أمر ضروري و لا مفر منه.
وفي كل مرة لازم يكون فما على الأقل واحد من الجيران سلعة وكاتابلازما ومن النوع إلي تكرههم بكل جوارحك...
مرة يطلع نسناس وحلم حياتو يعرفك شنوا مخبي في أحشائك وشنوا كليت البارح وشنوا هازز في الشكارة الكحلة... ويستنى بفارغ الصبر وقتاش تصيرلك مصيبة يلقى بشكون يتلهى...

ومرة يطلع حقار يراك تقول خنفوسة متعدية وكي تصبح عليه ما يجاوبش وكي يتعدى يغزرلك بشطر عين وكي تتعارك مع ولدو في الشارع بعد تكويرة يجي يسبك ويقلك ولدي سيدك... وفي آخر الأمر كلهم يطلعوا عائلة فاشلين من كل النواحي، هو يخاف من مرتو ولدو أبهم من صباطي وهكذا دواليك...

ماغير ما نحكيلكم عاد على العساسة متاع البالاص في المغرب إلي سكنت فيه إلي ماشي في بالهم يعسوا على سجن مدني. مرة قاعد في الجنينة في وسط البالاص صدموا عليا كلهم قالولي لازمك تبعد من هوني خاطر "العيالات" يطلوا من البركون والشيطان حاضر. رصاتلي نجتهد بكل ما أوتيت من فن باش نذكرهم إلي أنا نبول عليهم أجمعين وفي كل الحالات...

ولا هاكل الببوش بومصة إلي "بابوني" (ترجمة بابا بلغة إلي تولدوا في الحرير المغطس في الريق البارد) شرالهم دويرة جديدة باش يعرسوا فيها ومشى في بالهم سايي فتحوا إفريقيا، يبدى يعمل كل ما في جهدو باش يعذب الجيران... وما يعرفش إلي العاشرة إحترام الجار...
إلخ... وكان نقعد نحكيلكم عشرة سوايع ما نوفاش..

هو كان ما جاش الرسول وصى عليه الجار راني عملت من عذابهم صنعة، خوكم فاضي شغل وما نستنى كان في هذا...
ولكن كل هذه التجارب المريرة خلاتني اليوم نفد من حاجة اسمها جار وكل ما نتمناه نعيش في بلاد وحدي أقرب واحد يسكن بجانبي بعيد بعشرة كيلومتر على الأقل باش واحد يحافظ على صحة بدنوا وتماسك أعصابو.
نعرف إلي حلها اللجوء إلى المناطق الريفية، وهذا أمر موجود في المخطط الخامس عشر من حياتي انشالله ربي يسهل ونحققوا حتى ولو غادي الطبعة بزايد وأنا من الناس الرافضين قطعياً التطبيع مع إسرائيل...

10 commentaires:

bent 3ayla a dit…

الطبعة و لا التطبيع

ولد بيرسا a dit…

خليل
من غير ما تمشي للرّيف... إيجا لبيرسا تو تشوف الجّيران بالحقّ
أخوّة و تحابب و لا تنسنيس لا تنبير
أيجا جرّب تحصل
:-))))

Alaeddine Ben Abdallah a dit…

je te comprends, moi, je n'ai jamais vu mes voisins...

cactussa a dit…

j'ai les meme voisins et plus pires!!!

cactussa a dit…
Ce commentaire a été supprimé par l'auteur.
Khalil a dit…

@ bent 3ayla:
:))

@ Weldbyrsa
شنوة توا ؟ رد بالك لا يعديوهالك تحريض على الهجرة السرية... خاطر نتصور إلي بيني و بين بيرسا أكثر من سبعة بحور

:)

@ Ala:
Tu habites dans quel chateau ? :)

@ Cactussa:
Enfin, une personne qui partage ma souffrance :)

Alaeddine Ben Abdallah a dit…

haha, mes voisins de palier sont très discrets, c'et un immeuble et pas un château...dès fois j'ai envie de parler avec eux... mais bon

Khalil a dit…

Ala tu peux être sûr que ta situation est enviée par un bon nombre de personnes :)
"ched mchoumek la yjik ma achwem" :)

zahra a dit…

à chaque fois que quelqu'un demande à ma petite nièce
- chnoua issmek ?
- bent bouha!!
- finn tosskon ?
- ba7htha ejjiran !!!!

3ala ma bka boukornine 3ala jarou
el Beji, et3abbat edinya bel ma', b7har walla ...

Khalil a dit…

zahra excuse ma lenteur de raisonnement :)