العيد في عيون طفل

صغير في صغرو، عمرو عام وسبعة شهور...
إلي تعدى عليه ما تعداش على الرجالة...
يقاسي في العذاب، جراح وكسور...
في وجهو نبرة حزينة وغزرة مذبالة...

هو كبير في وجه العالم
الكبر عمرو ما كان عدة السنين
الكبر كي تصمد قدام الوقت الظالم
وقتلي ما تلقى بيها وين..

عبثت بصحتو الدنيا اللئيمة
خلاتو طريح الفراش
بقية الصغار معاهم الأميمة
وهو بوه في دار ما سمعش وما راش

يبكي على طول صوتو
نواح من قلب عليل
كل يوم ناس قاعدين يموتوا
وهو برجو جاء بظلام الليل

بعد مدة أيام دق بوه الباب
فرح الرضيع كي رأى قرة العين
قال يا بابا كيفاش تلوح الكبيدة ؟
قالو يا ولدي مكتوب مسبب الأسباب
غارق في الفقر توا ليا سنين
يظهرلي حكاية ماهيش عليك جديدة

ما تعداوش لحظات وقالو يا ولدي في الأمان
جيتك من الأبعاد والأجياب فارغة من المال
كان جاء في مقدوري نعيشك أسعد إنسان
لازمني نمشي نجري نصور الخبزة في الحال

رجع الرضيع يبكي بأعلى الصوت
تقطعت قلوب جميع الحاضرين
في العيد متغرب ذاق منها الموت
مكتوب عليه الشقاء منذ حل العينين