Les fidèles du Boukornine

mercredi 18 août 2010

شعبنا كي قنديل باب منارة ما يضوي كان على البراني



يا بوك يسمعوا بفلسطين، بالشاشان، بالباكستان، بأمريكا، بفيضان في فينيزويلا، بواحد عندو الجاير في البرازيل، براجل عندو الغاز في مصارنو في بوركينا فاسو (وطني الثاني)، بجفاف في السويد تي صدقني حت باريس هيلتون (الهيلتون إلي وراء ستاد الزويتن) تسرقلها كلبها في حي الملاسين...
 الكلها تولي تساند وتتضامن وتذرف دمعاً وتسكب شمعاً (دايور، ما فهمتهاش هاذي يسكب شمعاً أما برا بركة) وتلعن العدو المغتصب الظالم...
الكلها تولي ثوريين، وكان جاء الأمر بيدها تو تشوف آش تعمل. وكلها تفهم في السياسة. تي كلها يطيش عليها النوم وكان تلقى تفجر روحها في تواليت دار الجيران إحتجاجاً...
وكلها تلوج باش تتظاهر في شارع الحبيب بورقيبة هازين لافتات فيهم برشة أغلاط بالفرنسية... ويعديوهم في الجزيرة. وثلاثة أرباع المتظاهرين عندهم شلاغم ومرايات شمس...
وكلها تندد، وساعات مش تنديد عادي وإنما تنديد شديد هاكلي تنديد يخوف برشة متاع وحوش مش متاع بشر. وفما حتى جماعة، يحكيو عليهم، أنا ما ريتهمش بعيني، أما واحد صاحبي يحلف ويتكتف إلي رأى شكون يندى له الجبين جملة واحدة... ممكن تطلع صحيحة الحكاية خاطر في زماننا هذا ما عادش تستغرب...

وما إن يكون الأمر يتعلق بأولاد بلادك... 
آآاه... لا وقتها تولي ما في بالكش... وما قالك حد و آش مدخلك... وأخطانا الحيوط عندها وذنين...
وآش مجبدنا في هالمعامع...
ولاهي تلعب في طرح رامي في قهوة تسعة أفريل... 
وتغمز بعينيك...
وخاصةً خاصةً الجبين متاعك ما ينداش... الجبين متاعك شايح. 
تعرفش علاش ؟ خاطر الجبين متاعك مقبل للقاع.
وبظاهرة كيميوفيزيائة فريدة من نوعها تلقى جبينك شايح كي تبدى الحكاية في بلادك. وكي تبدى الحكاية بعيدة تهز رأسك تضربو الشمس يندي...
فهمتا كيفاش...

الحاسيلو كم أنت كبير يا شعب الخضراء مثلك مثل  قنديل باب منارة، ما تضوي كان على البراني... وبقلة ليها إذا ولد عمك يدهدس في الظلام ما دامك قاعد قعدة مزيانة، وفي طرح الرامي مازلت ما قوستش...

7 commentaires:

Anonyme a dit…

yakhi win kont mkhobbi????????
yesser fort

Anonyme a dit…

تحب تعتبر فلسطين "برّاني" أمورك.
أما راهو فما ناس ما تخممش كيفك، وما تنظرش لانتماأتها نفس نظرتك. فماذابيك تحلّ مخك شويه.
Frnchement je trouve tes derniers post tres demago.
PS:
كيفك انت بطل و "ماكش كيف بقية التوانسة" (هذي فكرة ماشية برشا هالأيامات)، اكتبلنا نص
Explicite
علي صاير توا أيامات في بن قردان. ولّا حتى هوما براينية؟

Boukornine a dit…

Khalil:
مرحبا بيك قبل كل شيء،
يظهرلي كلامك أقرب من كلامي للدمغجة... وفيما يخص فلسطين نتصوّر بن ڤردان أقربلنا بكل المعايير، والمقصود من كلامي الناس إلّي لاعبة فيها أبطال كي يبدى الأمر يتعلّق بخارج البلاد فمّة منهم إلّي في الشّبكات الاجتماعية و فمّة نقابات وأحزاب زادة.
يا سي إلّي مخّك محلول واللّهم لا حس، كيفاش تحبّ نحكيلك علئ بن ڤردان وأنا بعيد كل البعد و ما توصلني كان ربع معلومة.
لكن أنا متضامن مع أهالي بن ڤردان...
عمري ما قلت الّي أنا بطل أما هذا ما يمنعنيش باش نعطي رأيي بالطريقة إلّي تساعدني.
فلسطين داكوردو هي "القضيّة" أمّا دوب ما نولّيو محكية على مدن وأحداث صايرة في تونس يولّي واجب باش نهتمّوا بيها...
Voilà.

Anonyme a dit…

توا ثبّت روحك أقربلك بكل المعايير ولّا بعيدة كل البعد؟
comme quoi
قريب وبعيد أمور نسبية
برشا.
وبالكشي الناس الكل كيفك أخبار تونس توصللهم بالقطرة و يحكيواأكثر على الشأن الخارجي على خاطر التغطية الإعلامية أكثر بياسر؟
بن قردان "قريبة بكل المعايير" والي صاير في غير بن قردان زادا أخطر بكل المعايير. فشكون أولى بالإهتمام؟
(سؤال بالحق ماهوش سؤال إنكاري)

Primavera a dit…

t'as une sacrée plume mec 3arbi w souri j'adore :D

@ khalil : t'as mal compris à trop philosopher ça tue la philosophie, parole d'une fille qui a la Palestine dans son coeur et dans sa tête surtout ;)

Primavera a dit…

oups je viens de me rendre que Khalil c'est l'auteur de l'article, le propriétaire de la maison loool je pensais m'adresser à l'anonyme désolée :)

Anonyme a dit…

bravo pour cet article!