Les fidèles du Boukornine

dimanche 29 mars 2009

يا عصام يا ولد الشوالي براس الحنينة إرتاح ورتحنا


عصام الشوالي معلق رياضي ظاهرة في العالم العربي. عندو طريقة خاصة بيه في التعليق فيها برشة حماس (موش متاع غزة) وبرشة عياط وصياح والجمع بين عدة لغات والعديد من اللهجات. الحاصيلو، تبدى مقابلة تنعس حاشاكم البهيم على خريتو ويبدى السيد يتفاعل وحدو تقول الجيش الجمهوري متاع صدام يطيح في الآف-16 كي الذبان...

في مختلف أصقاع العالم العربي (متاع وذني) وقع تكريمو لأنهم يعتبروه أحسن معلق رياضي موجود على الساحة (هو وفاطمة متاع ع الشيباني وسع).
وزيد على هذا الكل ها الشخص هذا، تابع لقناة غاية في البلادة متعشية بالدنيا ومتسحرة بالآخرة. قريب باش تكتبلك:"حصرياً البطولة الصومالية على قناتكم المفضلة" ولينا في جرتها كلنا محصورين، ضربة ضربتين ندخلوا نجريو للمرحاض.. حتى من مباريات المنتخب الوطني التونسي يا بو قلب، "حصرياً على قناة...آ.آر.تي الرياضية".
توا يقول القائل، ما دام عندهم الفلوس آش حرق شعيري أنا ؟ حقهم المشروع باش يمرجولنا الكبيدة متاعنا ما دام أجيابهم رزان ياسر..

لكن يا أخي، تجي تفرض عليا معلق مريض بأعصابو كي تسمعو درج يركبلك الستراس، واحد يعلم بيه ربي، بين طلب العلم والخلاص متاع مختلف المعاليم متاع جودة الحياة.
شيء ما قالش بيه ربي...
والمشكل إلي الناس الكل تهلل وتبارك في هذا "الإبداع" مما خلى خونا عصام يزيد يكثر على ما وصاوه عملاً بمقولة ضحكولوا تمد على طولو.

هو كي تجي تشوف في قناة تونس سبعة، عندنا مخلوق عجيب إسمو توفيق العبيدي عندو قدرات تنويمية وملاحظات غير منطقية لا يستهان بها... ولكن على الأقل ما يزيدش يطلعلك السكر يهيجلك التبرية...
والمهم نترشحوا لكأس العالم 2010 انشالله ومن بعد يعمل ربي دليل...

4 commentaires:

chaouali a dit…

a mon avis il a du mérite d'etre la ou il est mtn; c une preuve de réussite tunisienne; tt le monde l'aime apparemment sauf toi

chaouali a dit…

a mon avis il a du mérite d'etre la ou il est mtn; c une preuve de réussite tunisienne; tt le monde l'aime apparemment sauf toi

بـانـدي...خـمـيّـس بـانـدي a dit…

هـيـهـهـهـهـه هـاااااااااااااااااااهـهـه هـووووووووهـهـهـه .... بـلـيـدة يـاسـر يـاسـر يـاسـر !عـنـدك ألـف حـقّ... الـبـارح "مـاتـش" الـمـنـتـخـب ردوّ نـهـائـي كـأس الـعـالـم هـيـهـهـهـهـه

ولد بيرسا a dit…

@ Chaouali:
il faut ajouter un deuxième, pcq moi aussi je ne l'aime pas DU TOUT!!!
و من غير ما تتنبز على خاطر اسمك كيف اسمو (و يمكن يطلع بوك و الاّ عمّك و الاّ حتّى تكون انت هو) أما برجوليّة كثّر على ما وصّاوه
أنا بصراحة يكسّرلي كرايمي، يهبّلني، يفتّقني من بعضي بالرّزن متاعو
وع وع، النهار الكلّ يزوي و يعيّط تقول درا آش صار (و هي تلقاها توش و الاّ مخالفة في وسط التّيران
و زيد فوق هاذا الكلّ نبّار.... ديما يغوّث كي البومة
بالعمل، مرّة في طرح التّرجّي و أهلي طرابلس، دوّرت نسمع في المعلّق الآخر على ما هبّلني بالتّنبير