Les fidèles du Boukornine

lundi 8 décembre 2008

اليوم العالمي لضحية العيد


عشرة سنين لتالي كنت نخرج العلوش ندور بيه من بلاصة لبلاصة،
كي نحكي معاه يغزرلي في عينيا، يسمعني حتى للآخر وعمرو ما يقاطعني..
كنت حتى نغنيلو ولو كان يبدى فما برشة نشاز، صديقي العلوش ما كانش يبالي بل يقعد يغزرلي غزرة تقدير وإعجاب...
كنت نهار العيد نبدى نهبط فيهم حيار، لا ما تذبحوهش، أعطيوه فرصة الحياة !
ومبعد نبدى كلي إشمئزاز وأنا نرى فيهم يشويو في لحم هذا الكائن اللطيف ونمشي نعمل كسكروت بالتن والجبن ونتوعد باش كي نكبر نغير وجهة العالم ونبطل الذبيحة جملة من البلاد...

ليوم كبرت شوية، الشاعرية والأحاسيس هزهم الريح...
ليوم هزيت سكينة وسميت بسم الله، ونزلت عليه نزلة واحدة...
من الوريد إلى الوريد...
أما قبل ما نذبح العلوش غزرتلو في عينيه، ريت نظرة عمري ما صادفتني قبل وكأنو يقلي يا خليل شبيك تبدلت ؟ موش كنت مسالم وتناضل من أجل حقنا في الحياة ؟
فيسع هبطت عينيا، ذبحت العلوش...
وهاني ماشي نعمل كسكروت بالهريسة والتن...

6 commentaires:

البرباش a dit…

هذيكة الدنيا يا خليل يل خويا

عيدك مبروك و كل عام و انتي حي بخير

Khalil a dit…

يا خويا البرباش ربي يفضلك لينا ويرحم والديك !
هيا تاخو قدمة من الكسكروت بالتن وسيب عليك من المشوي؟؟ ؟ :)

anonyme 2 a dit…

YA KHOUYA AIDEK MABROUK W SNIN DEYMA!!!

NB j fortement apprécié ton post sur tbib lboula!! c grandiose!!..

@++

Najet a dit…

3idek mabrouk ya Khalil, sneen déyma!!!
t'en fais pas trop...
hathika héya 7ekmet Rabbi ;))

RENZO a dit…

Hors sujet aussi. Aidek mabrouk à toi et à tes proches

pink_panther a dit…

...