Les fidèles du Boukornine

vendredi 21 août 2009

الحوايج في الماكينة... أنشرها ولك الأجر



الجملة هاذي ولات تعملي الحساسية. عندي جملة من اصدقائي على فايسبوك وفي الإيمايل مرجولي الكبدة متاعي بحكاية أنشرها ولك الأجر.

ساعة بربي فسرولي، من عند شكون خذاو كلمة إلي كان ننشرها عندي أجر؟ أنا شخصياً عندي مشكلة مع الغشة... شكون يضمنلي حكاية الأجر هاذي. تمشيش تدور قلبة مبعد ؟

وسؤال آخر: علاش إستعمال نبرة متاع تهديد ساعات وتسميع كلام من نوع: "إن لم تنشرها فلا تستحق أجرها".
أنا ما نستحقش أجرها وإنتي ما تستحقش نجاوبك.

قريب باش يطيح يسبلي في أمي وإلا يتعرضلي في الدورة خاطر ما مشيتلوش في هواه؟
وزيد بالقدر معاه، مش تقول كورنا البارح وإلا عملنا طرح رامي.

ماهو كي قدر علينا ربي باش تولينا داعية، أحكي برجولية، وقلي أنشرها برأس الحنينة وإن لم تنشرها نورمال، وقتها نقلك صحة وممكن ياسر نطيح بأقرب شريطة، ننشرلك دبشك وما غير مزية.

أما باش ندوروها لغة أنشر لا نغلط معاك، راهو ما يجيش، وشيء ما قالش بيه ربي... وعواشر توا مش مليح.

أقول كلامي هذا مع العلم أن جميع حقوق البث وخاصةً النشر محفوظة.
وإن لم تنشر كلامي هذا فلك أجر من عندي، دينار لايت إن كنت تونيزيانا وألفين إن كنت تيليكوم.

6 commentaires:

bent 3ayla a dit…

اللهم اسئلك غفرانك و احسانك، و الغنيمة و الفوز بالدينارين
هاي تدوينك منشورة ع الشريطة، هات الدينارين ولا ايجا ثبت كان تحب

medjri a dit…

3andek lo5ra zeda: "si tu es un vrai musulman", onchorha...
alfine aussi pour moi, romdhanek mabrouk wallahou lé youdhi3ou ajra l'mo7sinine! ;-)

الله أكبر a dit…

ya3tik el sa77a 3ala hal poste :)
farhadtli 3ala 9albi ... 5ater ena bidi cheded ro7i bech ma net3arek m3a 7atta 7ad min jma3it el facebook i jorret el klem el merzi mte3hom ... ayya mezetli nos se3a bech netsahhar ... yelzemni nchargi mli7 ... romdhan mabrouk ... w nsalek alfin ;)

el manchou a dit…

moi j'ai fait le tri dans facebook, tous ceux qui difusent ou m'envoient des cochonneries du type "malioun mouslem pour tralala" ou "machallat, miracles du coran"... je les ais BANNIS !

pink_panther a dit…

wallahi 3andek el 7a99!
kathrou!
koll we7ed 3amel fiha 3alim ou houa ya3ref wel be9i johhal ou ken mouch houa mechin lel finga!
hedha rahou ta3addi 3la el 7orriet echa5sia!

jiouchi a dit…
Ce commentaire a été supprimé par l'auteur.