Les fidèles du Boukornine

samedi 22 août 2009

كلنا معاً لمقاومة التصحر، والقومة بكري للتسحر



سخانة موش كان تفطر وتجيبلها أسلحة الدمار الشامل متاع إسرائيل وأمريكا وتزيد سيتيرنة ماء مصكج... ما تقدرش عليها.

وزيد يصدم علينا شهر الصيام في قلب الصيف... يا بوقلب!!!

ساعة قبل كل شيء رمضان مبروك على كل من يحب رمضان بما فيه الجو متاع التقمير في الليل والسهريات للصباح والبريك وشربة الفريك واللمة العائلية والمسلسلات وبالطبيعة أولاً التوبة النصوح لله عز وجل كان خلطنا عليها من العمايل الزرقة إلي تتبع فينا منذ سنين...

وحتى الناس إلي تكره حاجة اسمها رمضان وما ترى فيه كان جملة من سلوكيات لا تعكس سوى نفاق المجتمع... حتى هما انشالله رمضانهم مبروك ويوسعوا بالهم معانا بركة.

مع العلم إلي حد ما ألزم على حد باش ما عادش يسكر وإلا ماعادش يملى أيام بالي نسميّوه في ألدين الموبقات.

وأما في ما يخص إلي عاقد العزم باش يصوم شهر كامل انشالله وفرحان بحلول رمضان كأنو باش يقسم شطارى مع مولى قهوة الحومة كيما العبد لله... كل تمنياتي بعدم السقوط ضحية صيام يبدو أصعب من الباك والطب والدكتوراه مع بعضهم.
وكلمة أخيرة، السحور والسحور ثم السحور... للبقاء على قيد الحياة على الأقل حتى نتعرّف على إسم المترشح إلى كأس العالم متاع جنوب إفريقيا.

وإذا لا قدر الله... فاتك السحور يا صايم... فلك الله... وإلي خلق ما يضيّع

1 commentaire:

pink_panther a dit…

loool
ya3tik essa7a 3la hal post!