يا عصام يا ولد الشوالي براس الحنينة إرتاح ورتحنا

عصام الشوالي معلق رياضي ظاهرة في العالم العربي. عندو طريقة خاصة بيه في التعليق فيها برشة حماس (موش متاع غزة) وبرشة عياط وصياح والجمع بين عدة لغات والعديد من اللهجات. الحاصيلو، تبدى مقابلة تنعس حاشاكم البهيم على خريتو ويبدى السيد يتفاعل وحدو تقول الجيش الجمهوري متاع صدام يطيح في الآف-16 كي الذبان...

في مختلف أصقاع العالم العربي (متاع وذني) وقع تكريمو لأنهم يعتبروه أحسن معلق رياضي موجود على الساحة (هو وفاطمة متاع ع الشيباني وسع).
وزيد على هذا الكل ها الشخص هذا، تابع لقناة غاية في البلادة متعشية بالدنيا ومتسحرة بالآخرة. قريب باش تكتبلك:"حصرياً البطولة الصومالية على قناتكم المفضلة" ولينا في جرتها كلنا محصورين، ضربة ضربتين ندخلوا نجريو للمرحاض.. حتى من مباريات المنتخب الوطني التونسي يا بو قلب، "حصرياً على قناة...آ.آر.تي الرياضية".
توا يقول القائل، ما دام عندهم الفلوس آش حرق شعيري أنا ؟ حقهم المشروع باش يمرجولنا الكبيدة متاعنا ما دام أجيابهم رزان ياسر..

لكن يا أخي، تجي تفرض عليا معلق مريض بأعصابو كي تسمعو درج يركبلك الستراس، واحد يعلم بيه ربي، بين طلب العلم والخلاص متاع مختلف المعاليم متاع جودة الحياة.
شيء ما قالش بيه ربي...
والمشكل إلي الناس الكل تهلل وتبارك في هذا "الإبداع" مما خلى خونا عصام يزيد يكثر على ما وصاوه عملاً بمقولة ضحكولوا تمد على طولو.

هو كي تجي تشوف في قناة تونس سبعة، عندنا مخلوق عجيب إسمو توفيق العبيدي عندو قدرات تنويمية وملاحظات غير منطقية لا يستهان بها... ولكن على الأقل ما يزيدش يطلعلك السكر يهيجلك التبرية...
والمهم نترشحوا لكأس العالم 2010 انشالله ومن بعد يعمل ربي دليل...