توضيحات أخيرة حول البلوغسفير قبل النقطة إلي ترجعلني للسطر

في تدوينة سابقة كتبت على عاشور الناجي والأصوات إلي تنادي باش المدون هذا يقلع عن التدوين.
أنا نستعرف ما كانش عندي إلمام بالحكاية بكلها وبتفاصيلها الكل. طلعت فيها سبان، وتخربيش كرامة إلخ...
أنا مع بلوغسفير حية، تخمم، على قيد الحياة تمشي في الإتجاهات الكل أما فما إختراع إسمو إحترام لقيتو مفقود في جل الحوارات سوى من هذا الجانب أو من ذاك.
تقول حرب بين الحي الفوقاني واللوطاني وناس تستعمل في أسلحة غير مشروعة والإختلاف الوحيد هو أنو في الحي الفوقاني مغرومين بالتن وفي الحي اللوطاني السردينة تعجبهم خير.
يا خنازير يا كفار، يعطيك (***)، كلاب عربي، بلاصتكم في جهنم، سبان رب الإسلام...
أنا نعتبر روحي من مستوى راقي بكل تواضع، ونعتبر كل إنسان يحترم روحو عندو مستوى راقي، أما كي ولى التدوين فيه تشليك للعباد وتطييح قدر، نخير ما عادش نحكي على البلوغسفير إلي تستنى فيك بالسيوفة.
وما نقولش أحد الفريقين أحسن من صاحبو وإنما في البلوغسفير من المفروض ما يكونش فما فرق، وقيما قال جورج بوش يا معانا يا مع الآخرين، أنا ضد التجاوزات، ضد المناداة بالإقلاع عن التدوين وضد السبان زادة إلي يصدر من الجهتين وضد أنو واحد ما يؤمنش بربي يبدى يدعي أنو أذكى من العباد ولا أنو واحد يصلي ما يحترمش حقك في أنك تعبد بقرة.
نقطة ونرجع للسطر. سطر التدوين الحر إلي ما تكبلوش قيود، إلي يصير في الإحترام المتبادل، إلي ينقد كل حاجة يرى فيها العوج، إلي ما يهموش بكل الإتجاهات وعامل إتجاه وحدو: إتجاه التدوين على الجو ولتبادل الآراء على اختلافها.
وانشالله في البلوغسفير ما ننساوش الأهم ألاوهو الإبداع في الفضاء التدويني وما نكبشو كان في فلان بيه وفلتان عليه.
كلمة وتقالت والسلام على من إتبع الهدى وحتى على من لم يتبعه.