العاصمة الدولية للطبعة... بربي إمسح ساقيك قبل ما تدخل...

ما نعرفش كان ظاهرة الطبعة كل ما تصب قطرتين شتاء خاصة بالعاصمة التونسية وإلا ظاهرة تهم كل المدن العالمية...
أما برجولية ما نتصورش في لندرة وإلا في باريز جون وإلا باتريك يروح لدارهم بعشرة كيلو طبعة كيف ما يصيرلي كل نهار يتبلوا فيه الكاياسات...
آش وليت نعمل حسب رأيك ؟
كل ليلة نبدى نتبع في النشرة الجوية، كان يقولوا شمس نلبس على روحي وكان يقولوا أمطار ولو قليلة نحضر هاك السبادري غزالة على الأقل حتى كان تهلك ما نقعدش نتغبن عليه الثلاثة الشهر الجايين...
أما ماكم تعرفوها عاد النشرة الجوية متاعنا كيفاش يعملوا ؟
قالك يتلموا الزويز إلي يخدموا يشدوا دينار، يتفاهموا كان يجي رأس بورقيبة يقولوا برد وكان تجي الجهة الأخرى يقولوا سخانة...
التكتيك هذه طلعت إذن ما تخطفش ديما...
آشنوة حلها مالا ؟
ما دام لا مفر من الطبعة...
لازم واحد يتعلم يتعايش معاها في كنف (ما أحلى دين أمها الكلمة هذه) الروح الرياضية، يوم ليك ويوم عليك في الصيف الغبرة والناموس وفي الشتاء الطبعة والفيضانات...
آش كان عليه ؟
نحن لها!
ياخي ما عياوش يقولولنا كي كنا صغار، لازمك تتمرمد باش تولي راجل ؟
الحمدلله يظهرلي نحنا أرجل عباد ربي بفضل الطبعة...