قصيدة بلاش إسم

قصيدة بلاش إسم و بلاش عنوان
لا تتحلى بجميل الصبر لا بالسلوان
تلوج على موضوع تغني عليه
والعالم ما فيه ما يتغنى،الحزن ماليه

قصيدة تقاعدت قبل ما توصل للعجز
كلما تجي تحكي يحاصروها بجاز ولم يجز
قصيدة تحلم ترجع إلى أيام الطفولة
كلما تخرج حرف تنهرها بشدة الغولة

قصيدة موش عارفة روحها مكتوبة لشكون
تجي توصف في وردة تولي تحكي على أمحان الكون
قصيدة تغنات والصباح ما طلعش
إلي تسألو عليها يحلفلك ما سمعش

قصيدة محطوطة على قائمة المفقودين
قدامها كل الطرقات والبيبان مسدودين
إذا ريتها لازمك فيسع تبلغ عليها
وإذا ما ريتها غير اطلب من ربي يبعدك عليها