فنان مغلوب على أمرو

أنا فنان حزين مغلوب على أمري
محكوم نعيش منبوذ طول عمري
نغني على طول صوتي في ظلمة النفق
نتبنن رجع الصدى حتى ينقشع الغسق

نحلم بالشهرة و طموحي حب الجمهور
عايش مهموم وكل ليلة نبات مقهور
أكثر ركح هيبة طلعتلو كان في حانة
صوتي بحاح وقتلي قالوا وقت الصبح قد حان

نغني ونصور ونكتب ونلحن ولا مرة مهرجان طلبني
خاطر إسمو جورج وجاي من لبنان، عطاه ربي وغلبني
عايش وحدي في دار كراء في أعماق حي شعبي
وقتاش يا ربي تحن عليا، ونجني أخيراً ثمار تعبي

هرمت وصوتي ذبال، وإنقطع نهائياً الأمل
ضعفت وظهري تقوس ومشيت فيها فما العمل ؟

صحيبنا في دفينتو حضر نفر كبير
الكل ينعى فقيد الأغنية صاحب أجمل التعابير
أصبحت أغانيه تتخاطفها جميع الفنانات
من أضعف الأصوات إلى نجمات المهرجانات
ورسومو دارت العالم وتباعت بالمليارات
سافرت وراسمها في قبر لا شافت عين ولا رات

وهنا أعزائي القراء تكون حكايتنا وفات
والمغزى باش تنجح يا فنان لازمتلك شهادة وفاة