كلامي للبلوغوسفير

برشة ناس قالوا:

ما دام في بلادي الدوانة ولات دين
علاش الكتيبة وعلاش التدوين
علاش الحوار وعلاش تبذير الحبار
ما دام في مخاخنا عمرنا ما نوليو كبار

يلبس لبسة المجهول
يدخل يسب ويصول ويجول
لا يخاف لا ربي لامولى المول




ياخي بطبيعتي جاوبت:



مالكم يا أهل التدوين
كلكم على الهربة ناوين
نشدوا واحد يمشيو ألفين
وأحنا نجريو في البرد حافين

عذبتونا بطلعاتكم الغريبة
ما فهمناها أفكاركم الصعيبة
تحبوا العالم فيسع يتغير
و في لحظة مشيتوا خليتوني محير

دون يا مدون والشعب معاك
إكتب ما تخافش تو ربي يرعاك
بين السطور نحبك تنحت غناية
مطلعها:" يا حلم ما ليك نهاية"

هازز في قلبي كلمة الحق
نضوي بيها الباطل بنور البرق
نكشف بيها الظالم وإلي سرق
ما يهمني في إلي خلانا في الظلمة وحرق

البلوغوسفير عائلة واحدة
ما تخليوش خواتكم يتامى
حكاية تبقالكم قاعدة
مش كيف كلمة أهلا كيف بالسلامة