عازقينو رمضان

يا بوك يسمعوا برمضان قرب حتى ترى المطاعم الكل في حالة تأهب قصوى كلها تجبد الجرايد والكواغط وتبدى تلف في البلار عملاً بمقولة إذا عصيتم فاستتروا.
ويكتبوا بالكبير رمضانكم مبروك... خاطر بالنسبة ليهم رمضان هو أكثر شهر يخدموا فيه و هكا يولي أي كسكروتاجي يعمل مرابيح طائلة لأنه حسب الشعب التونسي بنة الماكلة في رمضان وقتلي فما ناس (ولو قلال) صائمين.
أكثر من هذا الكل واحد كي يفطر في رمضان في بلادنا العزيزة أصبح فخر للبعض وتلقاه في وسط الشارع شادد كسكروت ودبوزة قازوز غير عابئٍ بهؤلاء إلي ريقهم شايح وفاتهم وقت السحور وربي يعلم بيهم...
في الحقيقة بالنسبة ليا، فخر لبلادي أنه من قرر ألا يصوم ما يتصدى حتى حد لحريتو وما يفرض عليه حد حاجة هو مش مقتنع بيها مع العلم أنه في بعض البلدان الشقيقة (المغرب مثلاً ) القانون يعاقب بالسجن كل مواطن مغربي أفطر علناً في رمضان حتى لو كان في مطاعم سياحية... وهكا يولي فما عباد تصوم خوفاً من ردع القانون ونكونوا بعدنا ياسر على تعاليم الإسلام والأبعاد الروحية متاع سيدي رمضان.
والمهم في الآخر نكونوا كلنا كلينا البريك وتفرجنا في شوفلي حل وربي يحسن العاقبة